ވިލުފުށީގެ ގޭބީސީތަކުން ކުނިނެގުމުގެ ޚިދުމަތް ކައުންސިލުން ފަށައިފި

15 މާރިޗު 2025 (ހޮނިހިރު) - ވިލުފުށީ ގޭބިސީތަކުން ކުނި ނެގުމުގެ މަސައްކަތް މިއަދު ވަނީ ފަށައިފައެވެ. މި މަސައްކަތުގެ ދަށުން، ހުކުރު ދުވަސް ފިޔަވައި ކޮންމެ ދުވަހަކު ގޭބިސީތަކުން ކުނި ނަގަމުން ދާނެއެވެ.

ކައުންސިލުން ހާމަކުރި ގޮތުގައި، ބަދިގެ ޑަސްބިނާއި އަންދާކުނި ކޮންމެ ދުވަހަކު ނަގާނެއެވެ. އަދި ބިއްލޫރި އާއި ދަގަނޑުގެ ބާވަތްތައް ނަގާނީ ހަފްތާއަކު ދެ ދުވަހު، އެއީ ހޮނިހިރު ދުވަހާއި އަންގާރަ ދުވަހުއެވެ.

މި ޚިދުމަތް ފެށުމާއެކު، ގޭބިސީތަކުން ކުނި ނެގުމުގެ ޚިދުމަތަށް ރަޖިސްޓްރީ ކުރުމަށް ވެސް ކައުންސިލުން ވަނީ އިޢުލާން ކޮށްފައެވެ. މި ޚިދުމަތަށް ރަޖިސްޓްރީ ނުކުރާ ގޭބިސީތަކުން ކުނި އުކާލެވޭނީ އެކަމަށް ޚާއްޞަ ކުރެވިފައިވާ ގަޑިތަކުގައި، ޚާއްޞަކުރެވިފައިވާ ތަންތަނަށް އެކަނި ކަމަށް ކައުންސިލުން ބުނެފައިވެއެވެ.

ކައުންސިލްގެ ރައީސް ޙުސައިން ޖަބީން ވިދާޅުވީ، "މި މަޝްރޫޢަކީ ރަށުގެ ސާފުތާހިރުކަން އިތުރުކޮށް، ތިމާވެށި ރައްކާތެރިކުރުމަށް އެޅޭ މުހިންމު ފިޔަވަޅެއް" ކަމަށެވެ. އަދި މި ކަމުގައި ރައްޔިތުންގެ އެއްބާރުލުން ލިބޭނެ ކަމަށް އުންމީދު ކުރައްވާ ކަމަށް ވެސް އެމަނިކުފާނު ވިދާޅުވިއެވެ.

މި މަޝްރޫޢު ފެށުމާއެކު، ގޭބިސީތަކުން ކުނި ނެގުމުގެ ނިޒާމެއް ޤާއިމުކުރެވިގެންދާނެ ކަމަށް ބެލެވެއެވެ. މިއީ ރަށުގެ ސާފުތާހިރުކަމާއި ދިރިއުޅުމުގެ ފެންވަރު ރަނގަޅުކުރުމަށް އެޅޭ މުހިންމު ފިޔަވަޅެއް ކަމަށް ގިނަ ރައްޔިތުން ދެކެއެވެ